再考考大家，知唔知鳥的天堂其實講嘅係乜東東？冇錯嘞，講嘅係天馬河上有一個小島，佔地十八畝，島上有成千上萬蔚為奇觀嘅雀鳥棲身於榕樹之中。

繼續考考大家，知唔知鳥的天堂到底有幾多棵榕樹？冇錯嘞，唔係五十棵，唔係二十棵，只不過係一棵。

功夫茶提起巴金，提起鳥的天堂，無非係想話畀康文署冇乜常識嘅傻瓜知道，榕樹係一種體積龐大嘅巨無霸，有本事獨木成林，所以「一株榕樹便天堂」。不如睇吓巴金點樣寫：「我有了機會看見它的真面目：是一棵大樹，有着數不清的椏枝，枝上又生根，有許多根一直垂到地上，進了泥土裏。一部分的樹枝垂到水面，從遠處看，就像一棵大樹躺在水上一樣。」

所以話啫，尖沙咀栢麗購物大道旁邊三十棵有百年歷史嘅榕樹，其實係受到長期虐待㗎，因為政府完全冇提供足夠空間畀佢哋健康生長！

情況就好似一隻大象被困於籠屋咁樣，呢三十棵榕樹竟然唔係種落地，而係種入「花崗石花槽」。卒之搞成點呢？榕樹以肢體語言抗議嘞，忍無可忍搞革命嘞，樹根已經開始逼爆花崗石。

樹根惡鬥花槽，功夫茶諗到兩個可能，一係就花槽犧牲，一係就榕樹成仁。假如，榕樹最終不敵花槽，名副其實「百年歸老」枯死咗，又會有乜嘢後果呢？最近睇怕大家都熟口熟面咯，砰嘭！冧樹！輕則毀車，重則殺人！

話康文署傻瓜真係一啲都冇錯。油尖旺區議會認為應該畀榕樹鬆鬆綁，畀樹根抖抖氣，所以建議將花槽向行人道方向擴闊，只要外移呎半至兩呎，應該可以暫時避免集體虐待古樹。你估康文署有乜嘢回應吖嗱？佢哋話喎，嗯……嗰度人流好多噃，嗯……嗰度車流又好多噃，唔係好方便擴闊；仲有噃，嗯……地下有好多公共設施噃，全線擴闊花槽好似冇乜可能噃。

打死都唔肯擴闊花槽之後，傻瓜又話嘞，嗯……我哋會定期巡視㗎喇，我哋會好好護理㗎喇，確保榕樹健康生長。

功夫茶想問一問康文署署長周達明，如果有人掟你入去狹窄無倫嘅車尾箱，長期唔畀空間你舒展筋骨，係咪只要有人定期巡視同埋好好護理，你就唔會死呢？

一葉可知秋，一樹可知醜，由尖沙咀栢麗購物大道榕樹嘅悲慘命運可以見到，特區政府管理樹木係幾咁低能。政務司司長唐英年做咗管樹大隊長之後，情況會唔會改善呢？嘥氣啦，康文署家陣嘅政策係先斬後奏，有殺錯，冇放過，理得你樹木係咪健康生長，總之斬斬斬斬斬！救樹？唔好玩啦，斬斬斬斬斬！

功夫茶忠告市民，以後去尖沙咀行街街購物小心榕樹倒塌，因為香港唔係鳥的天堂，只係樹的地獄。