11/06/2009

播放本新聞相關短片

政情:3L變身經濟動力

本文重點
「3L」林健鋒(Jeffrey)、梁劉柔芬(Sophie)同梁君彥(Andrew)去年十月退出自由黨後,一直籌辦聯合新竇口,自立門戶,可惜歲月蹉跎,九個月成唔到事。我哋收到風聲,「3L」終於擇定吉日,喺今個月二十六日正式開檔迎賓,新組合取名「經濟動力」,仲搵嚟「新界王」劉皇發做顧問,以三加一嘅合作模式示人,即係話「3L」想擴充業務變「4L」,仲未到時候。

過咗大半年,3L打着商界代表嘅商標,謀求喺立法會芸芸政團之中殺出血路,早喺去年十二月,3L租咗金鐘中港大廈二樓全層做新竇,然後搵人組班,一搞就大半年,終於成事。

揭通勝擇吉日

據聞,六月二十六日呢個日子,係特登搵人揭通勝揀番嚟,仲指明一定唔可以係破日、赤口,睇嚟經歷過自由黨選舉重創、黨內紛爭、最後高調退黨嘅3L,依家對嗌交鬥嘴戒心特別重喎。我哋揭過通勝,廿六日宜開市,啱晒3L新竇開檔迎賓,當日會有小型酒會,到賀嘉賓嘅分量,唔多唔少反映3L嘅政治實力。

俗語話:「是福不是禍,是禍躲不過。」3L選擇自立門戶,預咗條路唔會完全平坦無阻,所謂兵來將擋,創黨立威其實唔使擇日咁花工夫嘅。反而,搵專家設計一個既寓意深遠又新穎嘅名字,更加實際喎。

眾所周知,近年香港政壇如雨後春筍咁湧現咗一批新「動力」,好似「西九新動力」、「民主動力」同「新力量網絡」咁,大家都食到有啲膩,再嚟一個「經濟動力」,似乎有啲熟口熟面,點秤都唔夠「3L」咁言簡意賅啦。

3L一度傳出邀得身兼行政會議成員嘅鄉議局主席劉皇發加盟,變身「4L」,據我哋了解,發叔唔介意同3L行得埋啲,不過會保留自由身,話晒發叔同「五散人」都好熟,日後大把合作機會,費事順得哥情失嫂意,於是只係應承為3L孭起一個顧問銜頭,日後3L有事就畀吓意見,有共同議題大家就有商有量,廿六日發叔亦會同3L一起上台,不過唔會做第4個L。

直擊人類豬流感最新疫情
詳情瀏覽on.cc《奪命流感》