過咗大半年，3L打着商界代表嘅商標，謀求喺立法會芸芸政團之中殺出血路，早喺去年十二月，3L租咗金鐘中港大廈二樓全層做新竇，然後搵人組班，一搞就大半年，終於成事。

揭通勝擇吉日

據聞，六月二十六日呢個日子，係特登搵人揭通勝揀番嚟，仲指明一定唔可以係破日、赤口，睇嚟經歷過自由黨選舉重創、黨內紛爭、最後高調退黨嘅3L，依家對嗌交鬥嘴戒心特別重喎。我哋揭過通勝，廿六日宜開市，啱晒3L新竇開檔迎賓，當日會有小型酒會，到賀嘉賓嘅分量，唔多唔少反映3L嘅政治實力。

俗語話：「是福不是禍，是禍躲不過。」3L選擇自立門戶，預咗條路唔會完全平坦無阻，所謂兵來將擋，創黨立威其實唔使擇日咁花工夫嘅。反而，搵專家設計一個既寓意深遠又新穎嘅名字，更加實際喎。

眾所周知，近年香港政壇如雨後春筍咁湧現咗一批新「動力」，好似「西九新動力」、「民主動力」同「新力量網絡」咁，大家都食到有啲膩，再嚟一個「經濟動力」，似乎有啲熟口熟面，點秤都唔夠「3L」咁言簡意賅啦。

3L一度傳出邀得身兼行政會議成員嘅鄉議局主席劉皇發加盟，變身「4L」，據我哋了解，發叔唔介意同3L行得埋啲，不過會保留自由身，話晒發叔同「五散人」都好熟，日後大把合作機會，費事順得哥情失嫂意，於是只係應承為3L孭起一個顧問銜頭，日後3L有事就畀吓意見，有共同議題大家就有商有量，廿六日發叔亦會同3L一起上台，不過唔會做第4個L。