黑英做官場「慳妹」，唔係為錢，而係身體力行為環保，節約地球資源啫。黑英尋日為一個環保企業頒獎禮做頒獎嘉賓，我哋聽到佢同朋友傾偈，話最近搬屋，發現舊屋有張用咗三十二年嘅梳化，用得唔好嘥，照搬如也，懶理張舊梳化襯唔襯間新屋。黑英仲自嘲，話：「你話我老婆幾慘呢，有個咁嘅老公！」

三十二年的確係一個唔短嘅時間，希望黑英對老婆都係咁長情啦；記住有時講吓生活情趣，千祈咪似張陳年梳化咁十年如一日。其實，黑英嘅愛妻都算好脾氣，無官一身輕嘅黑英，早排去旅行叉電兩個星期，不過唔係陪老婆歐遊喎，而係同朋友去有「小印度」之稱嘅巴基斯坦北部，重訪唐三藏取西經之路；換轉第二個，肯定扭甩佢隻耳仔。