本文重點
觀塘區議會主席陳振彬（Bunny）近年為培育青少年出錢出力，最近獲政府委任做青年事務委員會主席，佢一上任就急急埋首度橋，研究點樣提升三十歲以下青少年嘅競爭力，包括提升青少年運動潛能、藝術修養及語文能力。Bunny並非「口侃侃」得個「講」字，事關自己都身體力行，早前聘請一位老師返屋企教導兩個囝囝焯晞和焯煦學習普通話，就連佢都學埋一份，互相交流。
落注獎勵秘書
香港青少年語文能力和競爭力下降，有人話係同家庭富裕、嬌生慣養、娛樂太多有關。卓妮尋日在沙田馬場遇到Bunny，佢坦言父母愛錫子女好正常，問題在於點樣磨利子女把刀，讓子女增值。正如Bunny月前購入嘅馬匹「傳奇快車」，透過操練不斷進步，經過兩次出賽後，尋日終於守得雲開，爆出三十二倍大冷門，贏得香港國際馬匹拍賣會五月挑戰賽冠軍。
「傳奇快車」奪冠，Bunny喜獲一百二十萬元獎金，而佢自己就象徵式買咗一百元獨贏和位置為愛駒打氣，結果獲派彩四千元，但佢將筆彩金私人醒咗畀秘書。Bunny話，平時工作咁繁重，好多時都依靠秘書安排得妥妥當當，所以每次愛駒出賽，佢都例必落注買張飛畀秘書，贏咗就當係獎勵秘書平日嘅辛勞，打工仔遇着呢個老闆真係好！
卓妮