民政事務總署聘請合約或兼職社區幹事，呢啲職位係負責全港十八區嘅社區中心以及社區會堂嘅運作，做吓場地管理，布置吓會堂，仲要開門、閂門呀咁大把，簡直就係肥缺。
可惜呀，小市民唔好以為有筍工就遞表申請喎，隨時連時間都嘥埋。因為唔理閣下有博士學位或者有三十年管理經驗，統統都冇用。有讀者踢爆原來呢啲兼職，好多都係由民政事務總署本身嘅全職員工做番，肥水不流別人田吖嘛，鬼叫你唔係自己友咩。
民政事務總署仲喺度死撐，話該署依家有九名全職員工同時擔任部門兼職，但冇解釋到搵自己友做番嘅原因，又話已經就招聘制訂清晰指引，每次都會透過公開招聘以及成立獨立遴選委員會招聘兼職員工，現職嘅員工唔會有乜特殊待遇喎。
如果話民政事務總署冇益自己友，功夫茶打死都唔信！該署嘅兼職時薪閒閒地有三十四至五十元，你又知唔知私人機構有幾多呀？有工會調查過七大快餐連鎖店基層員工薪金，去年平均時薪只係得二十元左右㗎咋，最低時薪仲要低到去十六元添。
公務員工會聯合會主席梁籌庭都承認，部門請自己人兼職情況好普遍，皆因政府諗縮數，可以慳番招聘時間同錢。
有冇搞錯呀！公務員已經係薪高糧準，出晒名打唔爛嘅金飯碗，咁嘅時勢仲可以一身兼兩職，名正言順每月出兩份糧，認真和味，真係逆市奇葩人上人呀！
照計呢，鐵打都要抖吓氣㗎，公務員正職都未搞得掂，仲要兼職做多份，一日做成十四個鐘以上，點會有精神做嘢吖。唔怪之得好多公務員唔係手軟腳軟，就係蛇王瞓覺多過做嘢啦！
功夫茶唔係屈得就屈㗎，呢，話口未完，又有一單公務員蛇王醜聞喇。本報記者近日明查暗訪，跟蹤食環署元朗區販管隊，發現佢哋下午三點十五分返工，到晚上十點四十五分收工，實際落車用腳行嘅巡邏執勤時間有幾耐？唔夠半粒鐘咋，冇腳嘅雀仔就聽得多啫，唔通成班販管隊都係冇腳嘅？
咁其餘嘅時間要嚟做乜？真係唔使替佢哋擔心呀，做嘢就話艱難啫，食環署蛇王出晒名，佢哋認第二冇人敢認第一。佢哋返工唔係遊車河、睇報紙，就係去警署飯堂歎茶，再唔係返去車廠睡一睡，真係好過做元帥呀！
講到尾，港府高官所謂「保就業」根本就係得把口，表面就話開多啲職位，可以紓緩一下失業率，實情就係有人冇工做，有人做兩份，而且仲係筍工，咁樣塘水滾塘魚，唔怪得失業率咁高喇！好彩政府兼職嘅時薪只係幾十蚊，如果時薪係四、五千蚊，話唔定連嗰班司局長都爭住搵多份兼職呀！