本文重點
人類豬流感疫情不斷擴散，若要做好把關工作，除咗政府做好檢疫工作外，作為第一道防線嘅家庭醫生亦起着重要作用。
日前遇到身兼馬會董事嘅家庭醫學專科醫生李國棟，佢話現時嘅家庭醫生並非只單純開藥醫病，還有全人治療，深入搵出病人嘅患病主因；如果家庭醫生緊守第一道防線，相信可以減輕公立醫院嘅負擔，佢話多年來家庭醫生已達到專科水準。
何大一鍾南山主講
曾任家庭醫學學院院長、現任世界家庭醫生學會亞太區域主席嘅李國棟預告，嚟緊六月四日起一連四日，將在灣仔會展舉行世界家庭醫生學會亞太區域會議，屆時仲邀請咗好多猛人到場主講，包括愛滋病專家何大一、廣為港人認識嘅中華醫學會會長鍾南山及反吸煙領袖Judith Mackay等等。
不過，聽講首先出現豬流感確診個案嘅墨西哥，決定唔會派專家參加今次會議，未知係咪要留守抗疫呢？
香港有個醫學神童何凱琳，十四歲獲中大破格取錄，原來李國棟當年都稱得上係神童。六七年香港暴動，李國棟父母送佢到英國讀中學，點知考入學試時，校方認為佢嘅材料應該讀中四，於是乎連跳三級，上到大學修讀化學，回港後再讀埋醫學，讀兩個學位都只係比平常人用多兩年啫。李國棟好謙笑稱：「神咩童吖，可能係兩地教育水平唔同啩！」