本文重點
本月中立法會舉行特首答問大會時，政務司司長座駕喺立法會停車場大閘前少少位置，輾傷立法會保安主任右腳，搞到佢右腳腳面骨裂，依家仲喺醫院療傷。
立法會內會尋日幫手諗計改善停車場嘅設施，避免意外再次發生，班議員七嘴八舌，有人建議立法會裝番個減速裝置，有人就話不如將示威區搬去遮打花園，立法會秘書長吳文華提議不如將個大閘搬前啲，等有車嚟到嘅時候先開閘。
余若薇（Audrey）嘅意見仲刁鑽。Audrey話，以後如果多人嚟立法會示威，唔好只通知議員唔好揸車，應該嗌埋高官將架車泊前一個街口，行路嚟立法會，佢話呢個建議慳錢、環保、夠健康，事關啲高官成日話聽民意，坐冷氣房、房車點聽呀，所以煲呔曾先夠膽話自己嘅意見代表香港人。
民為貴，君為輕
亦有議員嘅建議畀人噓，好似林健鋒話示威人士好多時將標語、橫額掛出示威區，記者又企晒出車路採訪，似乎在埋怨示威人士同記者阻住條路；好在內會主席劉健儀夠公道，即刻話意外同人多完全無關。
謝偉俊索性叫啲示威者移師立法會後門嘅皇后像廣場示威，隨即有議員話「民為貴，君為輕」，有咩理由要啲示威者遷就班高官喎。咁都可以拗餐死，班議員都幾嘥時間！