本文重點
政府尋日公布新一屆科技大學顧問委員會成員名單，仔細一看，增加咗六個新成員，包括港交所行政總裁周文耀、滙豐銀行執行董事王冬勝，仲有合和實業集團聯席董事總經理胡文新。
今年三十六歲嘅胡文新，兩年前開始從爸爸胡應湘手中接棒，掌管家族生意，早前佢將擾攘咗成廿年嘅合和二期工程包裝後重新上馬，結果畀佢搞掂咗，連佢爸爸都讚佢叻仔。
又有新公職
做生意之餘，胡文新亦不忘社會服務。佢上個月先至被委任做理工大學校董會成員，依家又入埋科大顧問委員會。唔止咁喎，鍾意玩冰球嘅胡文新，同時又係香港體育學院董事局委員。
胡文新除咗顧及教育和體育，環保、金融都有佢份，早排佢就做埋推動使用電動車輛督導委員會成員，尋日又冧莊連任證監會諮詢委員會委員，咁多公務職銜，簡直係分身乏術。公務多，私務忙，唔知胡文新仲有無時間同爸爸食飯呢？