本文重點
金融管理局總裁接班人遴選工作黑箱作業，財爺鬍鬚曾鬼拍後尾枕自爆早在去年底成立三人遴選小組揀人，十足烹飪節目，人選一早「整定」，以煲呔曾愛將、特首辦主任陳德霖（攞命陳）做主菜，再搭幾條可有可無嘅芫荽伴碟。立法會泛民尋日喺內會提出在下周三休會辯論，誓要狙擊攞命陳，商界林健鋒（Jeffrey）赤膊上陣力撐政府，點知愈幫愈忙。
泛民批評金管局總裁遴選無透明度，事前又無諮詢立法會，佢哋遂以涉及公眾利益為由，要求下周三立法會進行休會辯論，仲要求每人五分鐘發言時間，泛民咁做，既為狙擊財政司司長鬍鬚曾，亦等政府喺七一前冇喘息機會。其實呢個泛民策略，早幾日已洩漏咗風聲，政府和建制派自然有備而來。「3L」成員之一嘅商界（一）Jeffrey尋日罕有地心口掛個「勇」字，做爛頭蟀開腔撐政府，話好多國家嘅中央銀行行長，例如英、美、澳、日及新加坡嘅央行行長，都唔會公開招聘，一般交由財金官員委任，所以唔存在有影響政府誠信問題。佢仲反問：「係咪吓吓要干預（政府）行政呢？」
畀劉健儀勁寸
Jeffrey總結指休會辯論一來無討論迫切性，二來毋須經立法會討論，所以反對休會辯論。其後商界（二）黃宜弘接力，呢個職位有專業功能，希望泛民唔好將金管局總裁人選政治化，否則總裁日後執行任務時變得舉步維艱。點知兩人話音一落，泛民議員群起圍攻，話遴選過程涉及利益輸送，又批評Jeffrey不贊成休會辯論，變相封殺佢哋嘅討論云云。
呢個時候有建制派政黨充當和事老話，表明該黨不反對休會辯論，不過就乘機暗寸泛民為批評而批評，話大家都係各抒己見，不必要批評，只會影響議員之間嘅關係。Jeffrey見勢色唔對，澄清自己從來無用「封殺」字眼，反指泛民抹黑佢，無言論自由。未幾，內會主席劉健儀（Miriam）按鐘叫議員表決是否贊成休會辯論。點知Jeffrey及時攔截話：「主席，我話反對啫，但無話要投票喎！」Miriam於是勁寸Jeffrey，話有反對意見自然要投票，好難話反對又唔使投票嘅，可能大家理解唔同啦！
內會最後在無人反對下決議在下周三進行休會辯論。今次Jeffrey撐攞命陳反而臨尾香變彈弓手，睇嚟下次應該部署好先至出擊嘞！