豬流感橫行度升級，學校隨時面臨停課。城大校長郭位都畀流感搞到咳嗽成個月未好，不過大家咪誤會，郭校長患嘅只屬一般流感，唔係豬流感，但惡菌一度令佢住院幾日，唔知係咪黑開有條路，出院時醫生竟然畀錯抗生素畀佢，令身子都弱埋。郭位不禁苦笑話：「我衰老喇，好耐未試過病得咁嚴重！」
由全國政協委員施子清創立嘅福建書畫研究會尋日喺中央圖書館舉行成立二十周年作品展，卓妮都貢去睇吓。郭校長透露，足足病咗成個月，咳嗽仍然未清，可惜上任城大後工作馬不停蹄，啱啱至去完台北及美國公幹，短短兩星期內合共飛咗五、六個城市，轉機都轉到頭暈。佢話唔知係咪太頻撲定係自己老咗，近日狀態麻麻，但就叮囑卓妮唔使避開，因為佢啲輕微咳嗽唔會傳染人喎。
留院兼食錯藥
郭校長仲爆咗個小秘密畀卓妮知，話月前病倒入住本港私家醫院時發生一段小插曲，話說當佢出院幾日後突然收到院方電話，話醫生將原來處方嘅止傷風藥變成抗生素開畀佢，叫佢馬上返醫院換藥。其實郭校長收到電話時已經將啲藥食晒，即係硬食咗幾日抗生素；入院已經好傷，仲要無端端食錯藥，簡直就係雙重打擊！
同場仲有身為3L成員嘅立法會議員梁劉柔芬，蘇菲梁自爆近日愛上攝影，最鍾意攞住部「黑莓」手機去到邊影到邊。唔通佢同時下年輕人一樣愛上自拍？非也，係影人唔係影自己，佢仲即場向卓妮展示一幅花朵作品，話計劃將呢個嗜好大力推廣，嚟緊以佢創立嘅「社區導者學會」名義舉行全港攝影展，叫人多啲捕捉開心鏡頭，唔使成日提住金融海嘯咁唔開心。
施子清晒書法
卓妮轉頭撞見行會召集人梁振英，講起豬流感來勢洶洶，問佢暑假會否去英國探望子女，佢話唔定叫仔女搭飛機返香港，費事仔女離開得太耐，唔記得香港喎。
講番個書畫展，施子清以主人家身份展出十多幅書法，其中最矚目係一排合共三十六幅寫上《心經》嘅作品，係佢新年用三粒鐘時間速成，呢啲就叫做工多藝熟嘞！施生又話寫書法比畫畫難度更高，皆因畫錯畫都可以用顏料遮蓋，寫錯一隻字就馬上「露晒底」，呃唔到人。
卓妮