全國青年聯會明年就換屆，兩位來自香港嘅副主席曾智雄及黃英豪將退下火線，騰出兩個空缺，其中一個多數由香港青聯主席接棒，另外一個空缺誰屬，依家尚未明朗。據聞香港菁英會主席施榮忻和新世界發展主席鄭裕彤嘅長孫鄭志剛（Adrian）都有意拗手瓜，唔知最後花落誰家。
香港唔少富豪名人後代，都將進身全國青聯視為踏足內地政壇第一步；若然做到全國青聯副主席，就更上層樓。不過，全國青聯並非話入就入，除了看家族背景外，仲要積極參與中港兩地青年事務，做出成績才能服眾。
被傳為全國青聯副主席熱門嘅菁英會主席施榮忻，呢幾年積極搞青年事務，嚟緊仲爭取在香港舉辦首次「博鰲青年論壇」，角逐之意呼之欲出，但佢本人就話唔想評論，想專心湊大菁英會。
鄭志剛參選睇緣分
同樣被視為熱門嘅Adrian，身為新世界集團嘅第三代接班人，依家係新世界中國執行董事，主責集團嘅中國業務，家族背景固然雄厚，近年都活躍於社會服務，既係香港青聯副主席，又係菁英會副主席。Adrian前日出席公司旗下活動，卓妮撞到佢，問佢係咪有意角逐全國青聯副主席，佢答得玄之又玄：「參選？睇緣分啦！我不嬲都支持青聯工作，唔係因為換屆先做嘅。」雖然呢個答案聽落似乎冇乜特別，但其實Adrian好少開金口，今次聽見「全國青聯」四個字就破例回應，睇怕佢口中所講嘅「緣分」，應該有幾分眉目嘞！
陳仲尼會好好配合
至於香港青聯亦將於今年中換屆，現任主席許華傑卸任後，好大機會由常務副主席陳仲尼接棒，自然好大機會順理成章成為全國青聯副主席。卓妮尋日在寧港青年交流促進會就職禮上遇到陳仲尼，於是問佢有冇興趣做埋全國青聯副主席，陳仲尼就以退為進話：「邊有得講興唔興趣吖，冇得為自己諗嘅，聯會咁多賢能之士，睇全國青聯認為乜嘢人選適當啦！就算邊個做都好，我一定會好好配合囉，叫我做乜嘢位置都無所謂㗎！」
做開證券投資生意嘅陳仲尼，上月擔大旗搞咗個大專院校畢業生招聘會，同菁英會等幾個青年團體提供六百五十個職位，當日鄭志剛家族旗下嘅新世界集團，都提供咗唔少職位，在金融海嘯下可說是為大專生帶來點點甘露。幾位熱門人選近日頻頻出招，看來都有意一爭高下，最後邊個跑出就要拭目以待嘞！
卓妮