呢嗱，本年度財政預算案喺立法會辯論嘅時候，議員要求曾俊華加碼紓解民困，鬍鬚曾十足一個守財奴咁打死都唔肯，因為政府表現孤孤寒寒，預算案幾乎史無前例被否決，最後都係低票通過咋。好嘞，預算案有驚無險通過咗冇耐，曾俊華轉頭又話嘞，政府將會一個月內推出新一輪紓困措施，仲係「既快且準」嘅。叫你做，你又唔肯做，唔叫你做，你又撲出去做，曾俊華到底係包拗頸，定係扮有型？
跟住呢一單仲好笑，冇耐之前之嘛，記者問財爺，金融海嘯之下政府高官係咪應該帶頭減薪共度時艱呀？曾俊華話喎，高官減薪對港府整體財政幫助不大。言猶在耳，薪酬趨勢調查顯示高級公務員減薪指標達到百分之五點三八，曾蔭權前日宣布問責高官主動減薪，不過減幅未定。既然係咁，記者梗係去追問曾俊華係咪支持減薪啦，佢嘅尷尬答案係：特首屆時會有公布。
你話係咪好得意先？早早唔去紓困，畀人踢兩腳先至做嘢；早早唔去減薪，畀人扑幾棍先至屈服。
老細出到聲話要帶頭減薪，三司十二局基本上冇人敢抗旨，個個扮晒叉燒話願意與市民站在同一陣線，比較滑頭嗰個係民政事務局局長曾德成，佢嘅回應係：「呢件事，哈哈哈！」
當然，遲到好過冇到，遲做好過唔做，後知後覺點都好過不知不覺。不過有一樣嘢值得大家留意，推出紓困措施未必係真心誠意以民為本，高官帶頭減薪更加未必係全心全意共度時艱，點解咁講？首先，如果有誠意，一早做咗啦，唔使等到捱咗兩腳、扑咗幾棍先至有反應。其次，唔好唔記得，一年一度嘅七一遊行就到嘞，點解新一輪紓困措施要喺「一個月內」推出呀？啱啱趕得切七月一日之前用嚟收買人心囉。
計功夫茶話齋，曾俊華唔係包拗頸，亦都唔係扮有型，一時一樣嘅原因係，市民如果唔係嘈到拆天，政府咪鐵石心腸乜都唔做囉，之不過咁，市民唔收貨，輿論唔放過，政府就要即時轉軚嘞，盡量減少七一遊行嘅人數。你知啦，七一遊行已經成為香港政壇嘅寒暑表，多過五十萬人就表示今鋪大鑊，少過十五萬人就表示還得神落。換言之，一切都係政治計算。
話時話，唔止曾班子會減薪喎，江湖盛傳金管局總裁任志剛今年十月一日拜拜之後，佢嘅繼任人都會「順應民意」減一減薪，年薪千萬呢支歌仔冇得再唱咯。
減幾多呢？功夫茶真係唔知，不過有一件事係肯定嘅，新任金管局總裁減來減去始終都會係全球同類職位最高薪嘅，因為家陣嘅副總裁底薪高達五百萬，作為上司咯喎，底薪冇番六、七百萬成何體統？所以話啫，以民為本喎，搵笨！