政情：公民講場：盲毛捉字蝨「反客」為主

特首梁振英（CY）尋日喺禮賓府同建制派茶敍，點名批評外號「正盲毛」嘅公民黨立法會議員毛孟靜，話佢當年帶頭拉篋反對內地遊客，加上近期反水貨客示威，令內地同胞感到討厭，係始作俑者。事實上，正盲毛去年曾在尖沙嘴天星碼頭外拖篋慢行抗議，要求政府為個人遊數目設限和取消「一簽多行」政策，以行為藝術趕客。不過，尋日傳有傳媒引述錯誤，將CY批評「反內地客」變成「反水貨客」，變相畀位正盲毛捉字蝨，回應傳媒查詢時仲笑咗幾聲，聲言冇試過鼓吹或呼籲其他人作任何反水貨客活動喎。不過，即使係反內地客嘅行為，係咪都唔值得鼓勵呢？