年過七十嘅李伯，喺中環擺檔擦鞋已經十六年嘞，一直冇人詐型，反而有好多熟客添，不知幾多達官貴人幫襯過佢，鍾意佢敬業樂業吖嘛。其中一位熟客羅先生透露，試過因為有急事所以催李伯快手少少，點知李伯唔肯，理由係：「擦鞋唔單止要你滿意，都要我滿意先得。」
嘩，如果香港人人學似李伯咁專業，醫院又唔會開錯刀，鐵閘又唔會砸死人，搭
又唔會笨豬跳，天下太平咯。
可惜吖，對於咁專業嘅工作態度，庸官劣吏係唔識欣賞嘅，平時習慣偷懶蛇王嘅食環署唔知點解忽然變得好勤力，竟然去部署圍捕擦鞋匠李伯喎，票控嘅罪名係阻街。講開呢次圍捕行動，真係勁到無倫，上月二十二日，食環署小販管理隊一共出動八員大將，喺中環美利道天橋嚴密布防，兵分兩路，左右包抄，雷霆一擊。功夫茶如果當時在場，一定以為李伯係殺人唔眨眼嘅悍匪。
今時今日搵食艱難，老人家卑躬屈膝擦鞋搵兩餐晏仔啫，點解係都要斷人米路？聽講，食環署係因為收到市民投訴，所以先至採取行動。功夫茶真係想知道呢個咁賤格嘅「市民」係邊個，唔會係近排積極掃街大搞清潔騷嘅其中一個局長啩？
票控李伯阻街都算嘞，最無情嘅係，食環署居然充公佢嘅謀生工具，包括鞋油、鞋箱以及一張櫈。唉，冷血官僚做到咁絕，難怪李伯好黯然咁話：「咁多年來我都唔靠政府，只係想靠自己，因為仲有人比我更需要綜援，點解咁都唔畀條生路我行？」
公道自在人心，好多熟客睇唔過眼，自發撰寫求情信，又收集途人簽名，聯署希望法庭輕判，至少有兩名法律界人士親筆稱讚李伯係一個誠實可靠嘅擦鞋匠。講到呢度，功夫茶有少少眼濕濕，唔通做人有骨氣都唔啱咩？唔通臨老靠自己一雙手維護僅有嘅尊嚴都有錯咩？食環署咁都要趕盡殺絕，學尊貴議員話齋，正一好「不該」嘅Poor Guy！
講真，李伯佔用嘅面積只係一呎乘兩呎，咁都算阻街？如果係咁，麻煩食環署署長卓永興落個柯打，將全香港所有街邊擺檔拉客嘅電話推銷員緝拿歸案，因為功夫茶覺得佢哋先至最阻街。
咦，話時話，卓永興都有身份證㗎喎，投訴李伯嗰個「市民」會唔會係佢呀？希望唔係啦，如果做署長做到咁賤格，唔止係Poor Guy，直情應該趴街！