會計界立法會議員陳茂波（Paul）啱啱訪粵返港，已經諗定暑假點樣過。去年阿Paul嘅大仔飛咗去英國牛津大學讀法津，一家少咗享天倫嘅時間，不過阿Paul已經諗好晒暑假節目，佢趁住兩個仔女都放假，請埋假一家四口齊齊去旅行。佢哋會先去意大利玩兩個禮拜，再去埋有「南韓夏威夷」之稱嘅濟州島玩多幾日然後至返港。為咗玩得自在啲，佢仲打算喺意大利自己租車，享受自駕遊。
講開又講，阿Paul嘅囝囝依家喺牛津讀緊書，全英國嘅豬流感確診個案超過八十宗，唔知會唔會搞到阿Paul心掛掛呢？阿Paul話，之前同大仔通過電話，聽到阿仔講學校嘅衞生都做得唔錯，好放心喎。當然依家豬流感蔓延得愈來愈厲害，阿Paul話會密切留意豬流感嘅最新進展，唔希望有大規模爆發，以免影響到佢哋嘅暑假行程喎！
除咗同屋企人去旅行輕鬆吓，阿Paul仲公私兩兼顧，準備六、七月再組團，帶埋香港會計師一齊上廣州，同省政府官員交流吓，為業界爭取吓權益喎，大家不妨睇吓到時有乜收穫。