講你都唔信，人稱「蘭桂坊之父」嘅盛智文喺蘭桂坊開咗十幾間餐廳同酒吧，竟然唔食煙又唔飲酒。每逢去Ball去Party，雖然成日都見佢好瀟灑咁拎住杯紅酒周圍走，但原來好多時都只係拎住唔飲，話要為自己身體健康着想喎，果然係徹頭徹尾嘅「扮嘢文」。
前周末喺個展覽見到盛智文，身為蘭桂坊協會主席嘅佢最近都有啲頭痛，原來佢有位職員患咗肺部纖維化，要換肺保命，佢近排就落力搵緊北京嘅醫生幫手。除咗親力親為搵醫生之外，佢話如果有需要，仲會提供財政援助：「錢唔係問題，最重要係身體健康！」
講開至知，原來盛智文一向好注重身體健康，除咗不煙不酒，每朝都喺屋企或者附近嘅健身室做超過一個鐘Aerobic呢啲帶氧運動。
唔怪得無論有幾多公職在身，每次見佢都係咁精神爽利。豬流感肆虐，佢叮囑大家要照顧好自己嘅身體，保持健康最重要！