豬流感喺港人旅遊熱點之一嘅日本愈爆愈勁，連旅遊發展局主席田少田北俊都好無奈，話近期訪港嘅日本旅客數目比去年同期大跌三成，實在不容忽視！田少解釋，無病徵嘅人都可以傳播病毒，令唔少遊客擔心會喺機上感染，所以少咗人外遊。雖然疫症肆虐，不過田少今年兩趟歐洲之旅都唔會改期，佢仲話坐頭等機位或者商務機位就無有怕。
離開立法會後，田少經常周遊列國享受人生，下個月又會同太太到歐洲參加郵輪之旅。豬流感肆虐，令歐美成為高危地區，田少就非常老定，笑笑口話佢多數坐頭等或者商務客位，呢類機位人少之餘座位寬敞，佢好放心咁話。佢又自爆前幾日同太太拍拖去國際金融中心睇新上畫嘅西片《天使與魔鬼》，一樣無戴口罩，似乎日常生活仲未受豬流感影響。不過老實講，未必人人好似田少咁有米，可以坐頭等位就真！
去完郵輪之旅，田少今年九月仲會去法國南部，參加Porsche Travel Club（保時捷旅遊會）嘅「自駕遊」，沿途經過康城、尼斯同埋蒙地卡羅等地方。田少諗諗吓，都覺得為安全計，做足預防措施較好，所以下個月去意大利首都羅馬呢啲人煙稠密嘅城市，都準備乖乖哋戴番個口罩喎！