風靡全球達六千幾萬觀眾嘅音樂劇《CATS》上周六喺香港公演，吸引城中名人撲飛先睹為快，著名工業家蔣震女兒蔣麗芸（Ann）都悉心打扮同老公Raymond齊齊入場，Ann蔣自爆唔使錢買飛，皆因當日係佢牛一，有老公請睇音樂劇喎。
Ann蔣話人大咗，唔再鍾意慶祝生日，費事畀人知佢大一年又老一年，所以今年生日寧願揀同老公Raymond過二人世界，手拖手睇音樂劇。Raymond一向體貼老婆，問佢送乜禮物畀太太，兩公婆有默契地不露半點口風，Ann蔣怕怕羞羞話：「呢個係兩公婆之間嘅秘密，點話得畀人知㗎！」咁溫馨，真係收罐蜜糖都開心喇。
同場仲有另一對夫妻檔，佢就係恒生女大班梁高美懿同丈夫，梁太卸下硬朗嘅行政服，以輕便套裝睇音樂劇，增添一份嫵媚。梁太原來係《CATS》嘅粉絲，喺英國欣賞過一次，今次《CATS》訪港，決定添食睇多一次，難得梁生樂意做觀音兵陪伴左右，女強人都變得小鳥依人。