中文大學尋日頒發新一屆榮譽院士，立法會議員張文光及前衞生署署長李紹鴻榜上有名。張文光獲太太及家人出動撐場，但泛民戰友就冇晒影，何解泛民兄弟咁唔畀面，原來係張文光擔心班兄弟啱啱由內地考察返港未抖順條氣，叫佢哋唔使嚟喎。
結伴校園拾松果
不過張文光都Call齊爸爸、大哥及三弟撐場，場面唔算失禮。講起佢同中大嘅淵源，原來佢畢業於中大經濟系，仲自爆當年求學時正處於學運火紅年代，身邊學生個個胸懷熱血，令佢經常為搞活動連功課都好少理。不過講到喺中大最大嘅收穫，就係娶到老婆喎。張太當年係中大歷史系學生，兩人緣定於大學迎新營，咪睇張文光外表老老土土，原來佢追太太嘅時候鬼咁浪漫，經常結伴喺中大拾松果，真係估佢唔到。
另一位得獎人李紹鴻亦有唔少醫學界老友捧場，前醫管局高層高永文醫生及行會成員梁智鴻都嚟到賀。講起豬流感蔓延到日本，高醫生有感而發，話流感一向喺亞洲地區特別流行，今次日本有大批人「領嘢」，顯示病毒已經喺亞洲區交叉傳播，隨時演變成「洗牌效應」，發展出另一種比豬流感更具殺傷力嘅流感病毒都未定，提醒港人咪掉以輕心！
李明逵愛上教書
同場仲有前警隊一哥李明逵（Dick），退休後嘅阿Dick不時出席母校活動，仲做埋中大校董。卓妮問佢點解唔學部分高官咁下海搵真銀，佢謙稱人各有志，唔覺得自己特別有風骨喎。
阿Dick近年教書教上癮，兩年前「香港公共行政學院」成立佢做院長，不時向內地官員傳授管理及危機處理心得，佢坦言教書冇乜錢收，只係掛個名，近日佢更聯同一班港區人大代表，自掏腰包請晒三十個四川省官員來港聽佢講書。阿Dick話，四川地震後內地官員荷包緊絀，所以食宿同學費都由佢哋包晒，認真唔話得。
卓妮轉轉話題，問佢有乜計獻畀警隊幫手捉拿旺角鏹水彈狂徒，阿Dick即時封口，話離隊已經兩年，唔再過問呢啲事喎，果然係不在其位，不謀其政。
卓妮