本文重點
人稱「3L」嘅立法會議員林健鋒、梁君彥同梁劉柔芬，自去年十月退出自由黨後，一直都話要正式改番個新名、開番個新總部同邀請其他獨立議員加盟，但經過長達七個月時間，至今只聞樓梯響。前幾日佢哋仲因為搞Gag玩出火，誤將兩名前高官葉澍堃同馬時亨擺上枱，言之鑿鑿話兩人將分別出任佢哋個新政團嘅主席同行政總裁，結果被全盤否認，據聞肥亨仲打電話省咗林健鋒一鑊！
立法會訪粵團上周五抵達深圳，林健鋒同梁君彥當晚請咗隨團採訪嘅記者食消夜，話題當然離唔開「3L」嘅組班進展。期間梁君彥唔知係咪飲啤酒飲大咗，笑言葉澍堃將會擔任佢哋嘅主席。同記者一齊飲香蕉奶昔嘅林健鋒，更加言之鑿鑿話肥亨會出任行政總裁。好彩在場大部分記者都深知兩人鍾意講笑搞Gag，冇喺未經求證下，就將兩人嘅大膽言論當真報道出街。
個消息最後都係出咗街，仲愈傳愈走樣，話肥亨雖然唔會出面做「3L」行政總裁，但會做幕後軍師云云，但兩個當事人都話完全冇咁嘅事。據聞肥亨為呢件事直接打電話省咗林健鋒一鑊，鬧林健鋒為咗「3L」，竟然擺佢上枱，認真唔夠朋友！查實肥亨辭官後不知幾逍遙，經常周遊列國周圍去打波，在港就日日去香港會做Gym，又點會咁易請得郁？
葉澍堃一笑置之
葉澍堃都同我哋講佢諗都未諗過幫「3L」。佢話早前喺個活動撞到梁君彥同梁劉柔芬，兩人問佢退休有乜搞，仲即場邀請佢做「3L」新主席，當時佢覺得對方只係講笑；即使今次發生咁嘅事，佢都一笑置之，話佢哋可能只係想搞吓Gag喎。不過呢個Gag搞得大咗啲，事關連在場有啲記者都信以為真。
葉澍堃話，任何認識佢嘅人，都應該知道佢唔會做呢啲嘢，更何況「3L」依家已經搵到一位「SL」（資深「Ｌ」君，指鄉議局主席劉皇發）加盟組成「4L」，佢自己嘅姓氏又唔係以「Ｌ」做字頭，使乜再搵佢呢？
查實發叔可能加盟「3L」合組「4L」，都係林健鋒同梁君彥喺立法會走廊傾偈時吹出嚟嘅風。不過發叔身邊人尋日一再強調，發叔無意加入任何政團，但年事已大，不排除就不同議題同友好合作，分擔自己嘅工作。莫非所謂嘅「4L」，都只係子虛烏有？