因乜事幹要求鄧爾邦落台呢？哦，無他嘅，審計署發表報告狠批平機會大花筒吖嘛，鄧主席自把自為利用公帑幫自己買重人壽保險吖嘛，保額高達七百萬，勞永樂咪提出不信任動議趕佢走囉。不過可惜吖，出席嘅委員之中，只有三票支持，七人投反對票，動議否決咗。或者可以咁樣講，原來鄧爾邦自己都有粉絲。咁就令功夫茶諗起一句名言嘞：曹操也有知心友。
濫用公帑嘅大花筒係咪就咁過骨呢？梗係未過骨啦，因為另一邊嘅立法會繼續跟進成件事，政府帳目委員會對於鄧爾邦依然咬住不放。尋日之嘛，帳委會就質疑平機會點解要用七萬八千元，大手購入三十二部空氣淨化機。另一筆數仲離譜，平機會使咗大拿拿十萬五千五百元，購買視像會議系統，哈，買咗番嚟之後居然只係用過兩次咁大把。
根據平機會嘅解釋，購買大量空氣淨化機嘅原因係職員經常感染呼吸道疾病，用咗之後人又健康咗，病假又請少咗。如果係咁，功夫茶建議公立醫院唔好執輸喇，大批大批購買空氣淨化機喇，你知啦，家陣豬流感咁得人驚，濫用少少公帑就可以保障醫護人員健康，幾爽呀！
吖，話時話，未經批准私自買保險益自己嘅鄧爾邦，係咪應該有樣學樣回水呢？所謂有樣學樣，係咁嘅，英國一樣爆出濫用公帑嘅醜聞，官員政客又係假公濟私，有人清洗泳池開公數，有人維修花園開公數，有人調校鋼琴開公數，總之事無大小一律開公數。呢單醜聞愈爆愈勁，卒之搞到首相白高敦公開道歉。至於有份濫用公帑嘅在野保守黨咯喎，更加係勒令黨員回水。
計功夫茶話齋，如果要學足英國佬，唔止鄧爾邦要回水，連佢嘅上司，即係政制及內地事務局局長林瑞麟都要公開道歉。之不過咁，英國呢單醜聞會唔會咁易收科呢？回水係咪就可以息事寧人呢？白高敦係咪有必要炒幾條魷魚祭旗呢？
講到尾，功夫茶有時都覺得鄧爾邦幾可憐，受盡千夫所指依然要死撐到底，「留低好困難」未嘗唔係冇道理㗎，因為要出盡九牛二虎之力，以狗屁不通嘅藉口不斷狡辯，真係好辛苦㗎。
不如咁嘞，反正鄧爾邦係董建華忠實擁躉，照辦煮碗話自己腳痛，然後以健康理由辭職，好過炒魷魚咁肉酸吖嘛。