統計處今日公布第一季本地生產總值，煲呔曾驚政府挽救經濟無方，激起民憤，尋日做定公眾期望管理，預告經濟下滑，全年經濟預測仲要相應下調，講穿咗，就係提早認衰！不過，港府預測經濟，成日計錯數，估通脹、赤字同金融海嘯形勢，二月份預算案預計，○九年全年本地生產總值有百分之二至三嘅收縮，言猶在耳，煲呔曾尋日又改口風，令人哭笑不得。
市民信港府，不如信商界，起碼有碗話碗，有碟話碟。香港總商會總裁方志偉（圓圖）尋日喺個商界論壇講起經濟預測，佢同港府嘅口徑好唔同。佢話會員企業有人生意差咗，亦有人好咗，依家好似定番啲，係咪喘定就好難講。不過總商會對今年經濟預測，都係維持原先估計嘅下跌百分之二，暫時唔下調。
工總嘅睇法同總商會好接近，主席陳鎮仁尋日出席工總Ｑ嘜頒獎禮時話，第一季經濟數字肯定唔及得○八年同期好，但比起去年第四季金融海嘯爆發時已好轉，定單多番啲。工總立法會代表梁君彥就要求港府擴大中小企信貸擔保計劃，將保額上限由六百萬元提升一倍至一千二百萬元，咁業界嘅環境就仲正嘞。預測經濟，港府同商界邊個準啲，年底揭盅！
| 人人做記者 爆料方法 : | 爆料熱線： | (852) 3600 3600 | 電 郵： | news@opg.com.hk | 網上爆料 |
| 傳 真： | (852) 3600 8800 | 手機網站： | m.on.cc | ||
| SMS： | (852) 6500 6500 | MMS： | ireport@on.cc |