豬流感（Ｈ１Ｎ１甲型流感）一發不可收拾，中國亦宣告失守。有人話呢場疫症係季節性流感，避無可避，篤信佛理嘅潮州商會永遠名譽會長莊學山就話，豬流感係因為墨西哥啲養豬場「欺豬太甚」，飼養環境惡劣，最終令病毒交叉傳染畀人類，認真係自食苦果！
莊學山早前出席佛聯會屬下學校藝術展，講起豬流感蔓延全球，佢深有感觸話，現代人飼養牲畜時過於功利，不擇手段追求利潤，最終搞出毒豬、毒雞及毒魚事件，令人類無啖好食，真係害人終害己。睇見連場食物爆發嘅大災難，莊學山寧願多茹素，減少食肉，但佢笑言齋食素都未必代表健康，最重要係保持心境平靜喎。
同場仲有佛教聯合會會長覺光法師，出家人不問世事，法師話唔評論豬流感事件。不過佢不忘點化世人，提醒大家要注重心靈健康，培養慈悲心。又係嘅，如果人人有啲良心，識得將心比己，有病時盡快求醫唔再四圍播毒，咁就天下太平囉！