本文重點
香港經濟前景未卜，市民水深火熱，煲呔曾對派糖紓困一味玩拖字訣，反而吹噓研究發展「炒冷飯」式嘅六大產業，繼續吹水治港，尋日終於喺立法會被多名建制派議員明嘲暗諷，篤爆所謂嘅六大產業，不過係新瓶舊酒，了無新意，更加有人直斥煲呔曾，話港人睇公營醫院專科等到死都未有得睇、大學生比例唔夠兩成，港府反而口口聲聲要拓展醫療、教育等境外服務，簡直係本末倒置。
煲呔曾次次上立法會答問大會，都想乘機攞彩，尋日都唔例外，開場白一開口，就為抗疫戰邀功，大談港府抗擊豬流感（Ｈ１Ｎ１甲型流感），然後講經濟，喺中長期經濟發展大計方面，由於乏善足陳，竟然將水分極重嘅「六大產業」大計搬上枱，仲自詡今次唔係空談無根，即時畀議員當場將六大泡沫逐一篤爆。
李鳳英扯火鬧爆
勞聯李鳳英一聽到「六大產業」呢個「假大空」新代名詞，即時火滾，話港府口口聲聲要發展教育同醫療服務，講到天花龍鳳，英明神武，但現實係公營醫院資源匱乏，香港市民睇專科，排隊輪症條隊長過萬里長城，到死都未見到醫生；九間大學同樣學位不足，青少年嘅大學生比率只得一成八，港府發展教育同醫療服務，係咪都應該顧咗香港人先呀？
英姐傷愈無耐，都被煲呔曾激到扯火，煲呔曾呢六大產業幾惹火，可見一斑。「怪醫」梁家騮更加唔畀面煲呔曾，明寸港府話，初時聽到發展醫療服務，本來都好興奮，想參加經濟機遇委員會嘅小組討論，可惜無機會，不過，當佢攞份小組討論結論睇吓，就發覺唔使預佢一份嘞，因為咁多年嚟改善建議都係一式一樣，欠缺土地建醫院呀、醫護人手不足咁，呢啲問題，業界反映咗好耐啦，港府會聽嘅話，一早聽晒啦。怪醫講到興起，仲即場向煲呔曾投訴食物及衞生局局長周一鑊同發展局局長林鄭月娥添。
紡織界梁劉柔芬（Sophie）平日好聽政府支笛，尋日都忍唔住暗踩港府。Sophie話，業界一路覺得六大產業有潛力㗎嘞，但想反映意見，又有乜渠道呢？煲呔曾答：可以用互聯網吖。Sophie即刻聲都唔聲，心中有數。梗係啦，港府當年又係叫港區人大同政協以互聯網向港府反映意見，政協、人大照做，但意見最後石沉大海。煲呔曾又嚟呢招，搵鬼信咩！