唉，查實使乜做調查至知吖，喺金融海嘯之下，打工仔未炒魷、未減薪已經算係逆市奇葩；銀行閂水喉，中小企借貸無門，舖頭可以捱得住唔執笠，簡直要燒炮仗慶祝！
市民叫苦連天，個個勒緊褲帶捱世界，最弊係財政司司長曾俊華捂住耳仔當聽唔到，一味翹埋手等運到。
佢份財政預算案除咗篤數齋噏「保就業」之外，仲玩數字遊戲，以財赤為理由拒絕大刀闊斧紓困。之不過最近當局公布去年財政狀況，一嘢踢爆佢估錯數，政府唔單止冇赤字，仲有盈餘添。好難唔令人懷疑佢有心估錯數，特登用呢種「狼來了」嘅伎倆拒絕派糖。
查實鬍鬚曾根本無心回應市民嘅訴求，所謂等到經濟繼續惡化先至加碼推出新措施，只不過係緩兵之計，連細路仔都呃唔到。其實，依家市道衰到貼地，失業率升到爆晒燈，成二十萬人冇嘢做，鬍鬚曾仲死攬住嗰一大筆財政儲備把鬼咩，唔通要打工仔個個瞓街乞食至出手呀？
望政府打救，真係望到頸都長埋，港府踢極都唔郁，眼見鄰近地區好似台灣同一啲內地城市都大派消費券，名副其實恨死隔籬。
澳門仲大手筆，舊年現兜兜已經派過一次錢，今年又再重錘出擊，永久居民派六千元現金，連非永久居民都有三千六百元，人人有份，永不落空，反觀港府孤寒到一毛不拔，港人得個恨字。
正所謂福無重至，禍不單行，香港被金融海嘯打到殘，仲要撞正豬流感，雙鬼拍門，真係雪上加霜。最弊係港府抗疫招數有姿勢冇實際，把關把到好似無掩雞籠，搞到風聲鶴唳，人人自危，經濟死多二錢重。
經濟搞唔掂，民生搞唔掂，連醫療衞生都搞到七國咁亂。大家有眼見，醫療失誤、藥物事故五花八門，無奇不有。鬼咩，有食物及衞生局局長周一嶽喺度，上樑不正下樑歪，唔出事至奇。
唔怪得今次中大調查發現，受訪者對七個政策範疇嘅唔滿意程度高過滿意程度，同市民嘅期望係有好明顯嘅落差，反映政府嘅政策表現衰到貼地，原因好簡單，就係成個官僚架構百病叢生，醫番都嘥藥費。
唔好話功夫茶唔單一聲，依家民怨已谷到極點，因住小市民嘅怒火燒起上嚟，一發不可收拾呀！