好心鳳凰衛視唔好有樣學樣啦，壹淫媒就話冇料到，所以不斷抄襲東方啫，搞出「東方做、蘋果盜」嘅傳媒怪現象，鳳凰衛視嘅老闆又唔係淫賤黎，有必要自甘墮落咩？冇料到咪冇料到囉，唔使死嘅，侵犯版權就唔同嘞，係會受到司法制裁㗎。事實上，東方報業人事資源有限公司已經入稟高等法院，控告鳳凰衛視控股有限公司，以及鳳凰新媒體有限公司。入稟狀指出，被告未經原告同意或授權，複製原告嘅文字以及美術作品，即係on.cc發表嘅娛樂新聞報道以及圖片。
話時話，東方其實已經畀足面，事關鳳凰衛視嘅侵權行為已經唔係第一次。早於去年年中，東方已經發覺鳳凰網出現大量on.cc嘅「Ａ貨」，去信要求對方正視問題。當時，鳳凰網向東方發出道歉信，承認編輯人員有所疏失，同意刪除所有侵權文章同埋圖片，承諾不會再犯，而且願意支付二萬多元。呢嗱嗱嗱，事隔冇耐咋，言猶在耳㗎，鳳凰衛視一個屈尾十又去侵犯東方版權，如果話上次係暗偷，今次就係明搶，點忍呀？冇辦法，面係東方畀，架係鳳凰丟，法庭見！
專家點睇呢單官司呢？研究版權法嘅法律界人士江炳滔讚揚東方嘅做法係正義行動，能夠懲戒侵權者。立法會議員劉江華亦話，傳媒更應該以身作則，尊重知識產權。其實，學校由細教到大，千祈唔好抄功課，乜鳳凰衛視袞袞諸公冇讀過書嘅咩？
計功夫茶話齋，一日最衰都係淫賤黎教壞細路，香港傳媒生態畀佢污染到亂七八糟。鳳凰衛視未必讀得書少，只不過拜咗淫賤黎為師，終於誤入歧途。細路，乖啦，不可一，不可再，向魔鬼說不，向侵權說不！
講開淫賤黎嘅侵權行為，真係多到數唔晒，最經典嗰劑梗係《蘋果日報》盜用東方嘅王菲獨家懷孕照啦。後來，《蘋果日報》嫌侵權未夠過癮，索性以不當手段向東方記者套取新聞資料。不過又好奇怪喎，東方據理力爭要求執法啦，哈，執法機構查來查去，硬係唔知幾時先至查完。
有人可能會問，壹淫媒無惡不作，點解依然可以肆無忌憚嘅？最近有前任雜誌總編輯被法官判坐監，之但係，壹淫媒違反《淫褻及不雅物品管制條例》過百次，餐餐都係輕判罰款一萬幾千了事，莫講話唔使坐監，連罰重少少都冇，點解會有咁筍嘅優待？道理其實一字咁淺，政府包庇囉，司法縱容囉，淫賤黎有免死金牌囉。再係咁樣容許淫賤黎教壞細路，香港玩完㗎喇，社會是非不分，人人道德淪喪，你想睇新聞咩？唯一選擇係東方，因為其他全部係你抄我、我抄你嘅Ａ貨！