人稱「3L」嘅林健鋒（Jeffrey）、梁君彥（Andrew）同梁劉柔芬去年退出自由黨後，一直想喺立法會招攬獨立議員加盟，壯大聲勢。梁君彥日前說漏嘴，話「3L」可能會變成「4L」，但又唔肯透露第四個「Ｌ」係邊個。鬍鬚曾由美國返港後，繼續向立法會議員諮詢年中嘅加碼措施，尋日「3L」見鬍鬚曾嘅時候，真係多咗個「Ｌ」，呢個就係劉皇發喇，唔通發叔決定加入「3L」？
人面甚廣嘅發叔笑謂自己一向百搭，同立法會班同事個個都夾得嚟，同五散人都啱㗎！發叔又話，佢覺得「3L」嘅刺激經濟建議同自己諗法不謀而合，咪同佢哋集中火力同鬍鬚曾傾囉。
據聞「3L」呢幾個月一直落足嘴頭游說發叔加入，但冇黨一身輕，發叔點都唔肯開金口講句「我願意」。Jeffrey同Andrew尋日賣口乖讚發叔係良師益友，以前定將來都希望同發叔多溝通，保持合作關係。其實「3L」同發叔做咗黨友多年，就算無一個確實名分，一樣可以合作啫。