本文重點
泛民之中嘅無證（回鄉證）人士，以前成日呻無緣踏足神州大地，不過，當機會降臨，佢哋又嚟搞破壞。立法會訪粵團下星期五啟程，尋日又起波瀾，而又嚟搞風搞雨搞破壞嘅，正係其中四個無證泛民議員，即係何俊仁、劉慧卿、李永達同涂謹申，佢哋向立法會秘書處表明，反對「綑綁式」隨團限制，唔係就集體退團。
廣東省安排立法會經濟發展與環保兩個委員會聯合訪粵，擺明經過精心運算，將泛民激進路線最出位嘅成員摒諸門外，整個團規模又有番咁上下。不過，千計萬算，密底算盤打得再響都好，泛民要搞事，就好似豬流感要殺入香港，點阻都阻唔到。
今次訪粵團中，泛民無證議員有六個，鄭家富一早講明唔參加，何秀蘭難得北上開騷，樂意奉陪到底，但另外四個白鴿黨團友，即係何俊仁、劉慧卿、李永達同涂謹申，就無咁順攤，佢哋鐵了心要做其反對派，連報團北訪都反得一餐。
何俊仁尋日表明，反對內地「雙規」無證議員，即係規定同一時間、同一關口出入境，兼且唔可以遲到、早退、中途離團，要與全團「綑綁式」行動，並向立法會秘書處表達不滿，指如果唔改遊戲規則，佢哋就唔去。訪粵團嘅賣點，係與泛民同行，何俊仁威脅退團，即係玩一拍兩散啫。
其實無證議員北訪受「雙規」，已成慣例，以往立法會交通事務委員考察西部通道口岸，去年二十人代表團探訪四川，都有類似規定，點解何俊仁佢哋四個今次反應咁強烈？講到尾，咪係惟恐天下不亂，為反對而反對囉！經此一役，「反對派」呢個冠冕，佢哋想搣都搣唔甩啦。
立法會秘書處回應查詢表示，主席已經叫咗秘書長吳文華，將何俊仁四人嘅意見，向廣東省反映，初步回應話會「認真考慮」。反對派搞事是否得逞，相信日內有答案。
搵定議員頂替
另一方面，立法會為有人玩嘢一事，亦做好兩手準備。今次訪粵團嘅合資格團友共有三十六人，截至前日，有二十九人報咗名，無參加嘅，除咗鄭家富外，仲有詹培忠、李國寶、方剛、何鍾泰、黃容根同梁美芬六人，側聞上述六人當中，有人尋日收到立法會主席電話，誠邀同行。咁急打鑼徵召團友，唔使問，梗係驚一旦四名無證議員退團，訪問團人丁單薄唔好睇，所以搵定人湊數啦。