豬流感在全球迅速蔓延，歐美多國嘅確診人數不斷上升，雖然香港疫情暫時受控，但相信唔少港人都擔心在歐美定居嘅親友，好似自由黨主席劉健儀（Miriam）咁，父母和囝囝偉釗都在美國生活，佢把口就話一啲都唔擔心家人安危，但一聽到偉釗話有要事去疫情較嚴重嘅紐約，即時大為緊張，隨即發電郵勸喻偉釗唔好去。
卓妮聽Miriam講，偉釗現正喺美國攻讀碩士課程，過去平均兩至三天才回覆佢一次電郵，但當收到Miriam叫佢唔好去紐約嘅電郵，就罕有即日回覆，並羅列一大堆必到紐約嘅理據，激到Miriam生蝦咁跳，話囝囝唔聽話喎！縱使偉釗諸多理由，但都唔及一個重要理由，就係被Miriam錫到燶，仔大仔世界，始終都係要放行。
Miriam話，偉釗一啲都唔擔心豬流感疫情，反而覺得香港防疫過分緊張。不過，為免對疫情掉以輕心，Miriam都再三叮囑偉釗，一定要勤洗手，避免感染病毒，而自由黨近日亦搶購十萬包消毒濕紙巾，由Miriam親自落區同各區區議員派發，前日與西貢區議員方國珊率先在新界東派發，希望喚起市民勤洗手習慣。
卓妮