本文重點
智經研究中心唔經唔覺已經成立三周年，一手湊大智經嘅研究中心主席胡定旭尋日同傳媒聚會，為未來研究集思廣益，卓妮都有去湊熱鬧，發現身兼醫管局主席嘅肥胡，喺豬流感橫掃全球嘅日子，隨身帶備消毒藥水抗疫，殲滅毒菌於彈指間，果然係醫管局阿一！
智經三年前成立，當時請到時任紐約聯邦儲備銀行主席嘅現任美國財長蓋特納來港出席晚餐座談，之後發表多份研究項目，好似檢討單程證制度，同埋倡建深港都會圈咁，喺社會都引起關注。肥胡尋日同卓妮講，智經未來目標，係就不同社會議題發聲，睇嚟佢做智經主席，愈做愈過癮喎。
口罩需求勁過沙士
肥胡同時戴住醫管局主席頂帽，豬流感入侵香江，佢大把古仔可以吹水。肥胡透露，○三年沙士期間，醫管局轄下各醫院耗用口罩，高峰期每日最多都係用三十萬個，但豬流感爆發，最初嘅使用量由平日十萬個升到廿幾萬個，去到「五一」勞動節香港發現首個墨西哥確診人士之後，口罩需求更加暴跳至五十七萬個，真係嚇人一跳。
香港人經歷沙士一役，所以小心咗，醫院要多啲口罩存貨，有備無患，都係正常嘅，肥胡話，醫管局一直有入貨買口罩，足夠三個月使用，叫大家放心。至於醫管局為咗打呢場仗嘅額外經費，口罩係小數目，全套保護衣同面罩先至重皮，粗略估計，起碼幾千萬，甚至去到一億元都唔出奇。不過，大部分物資都可以留作儲備，事關呢類物品存放幾年都冇問題。
卓妮