工聯會領導層上星期換屆，一直傳出會接任黃國健做理事長嘅副會長林淑儀大熱倒灶，輸咗畀副理事長吳秋北。直至前日工聯會五一勞動節酒會，林大姐照樣擔大旗招呼賓客，而佢丈夫、立法會議員黃定光亦做跟得老公，仲好似入咗工聯會咁做主人家幫林大姐招呼賓客，成個工聯會姑爺咁。問大象哥究竟係主人家抑或嘉賓，佢就笑笑口話：「總之乜家都好啦！」
其實林大姐上位夠資格有突，只係工聯會早就部署讓年輕人上位，為日後直選鋪路，於是擁戴林大姐嘅人就對外發放「林大姐紮職」消息，以營造既定事實。大象哥早排都有份事先張揚，預言佢老婆林大姐會接棒，莫非因為佢多口累事？大象哥就話：「梗係唔係啦！」對於未到四十歲嘅吳秋北上位是否爆大冷？大象哥就話：「一啲都唔冷！」唔通佢老婆至係冷門？