有冇人咁好彩中到三重災呢？你都咪話，真係有，只要你係大澳居民，今年有機會連捱三災。
大家先睇一睇尋日上演嘅一齣好戲。民政事務總署署長陳甘美華威風凜凜去到大澳巡視，皆因當地打鑼打鼓進行水浸預警通報演習，參加演習嘅包括消防、警方、民政事務總署等等二十幾個政府部門。演習係模擬颱風襲港，大澳發生水浸，居民不幸被困，展開拯救程序，例如出動橡皮艇救人。
大家可能會話，好吖，正噃，未雨綢繆吖嘛，預防勝於治療，冇理由等到大禍臨頭先至急就章補鑊。功夫茶本來都係咁諗，就好似應付世紀瘟疫豬流感之嘛，冇理由學似○三年沙士爆發咁雞手鴨腳嘅，一定要做足所有預防措施，包括瘋狂搶購口罩，洗手洗手洗手，消毒一比九十九，非不得已先至換特首。所以啫，見到二十幾個政府部門齊心合力進行預警演習，你都咪話唔感動。
之不過咁，當你諗深一層，你又會覺得奇怪喎，平時奉行少做少錯主義嘅公務員，因乜解究忽然咁熱心呢？哦，原來真相係咁嘅，大澳防洪工程尚未完成，要等到雨季結束之後先至收工。換言之，大澳仍然未受到適當保護，居民繼續處於高危狀態，陳甘美華惟有退而求其次，利用水浸預警通報系統叫人走難。陳甘署長話喎，一旦有颱風襲港，天文台會評估情況發出預警，渠務署計算發生水浸嘅風險，再由各個部門作出協調，如有需要，會預早通知大澳居民疏散。
大家都記得啦，舊年四川發生五一二大地震之後冇耐，颱風黑格比襲港，大澳出現嚴重水浸，搞到斷水斷糧又斷路，孤立無援嘅居民形容自己係「四川災民」。事後特區政府拍晒心口，應承呢樣答應嗰樣，總之就係解決大澳嘅水浸問題。事隔差不多一年嘞，颱風季節又即將降臨嘞，吖，死得佢吖，防洪工程居然慢吞吞，水浸重災區永安街旁邊嘅河道築堤防止海水倒灌工程，更加要等到二○一一年先至有望完工。咁搞法，死得啦，又話要活化大澳，將呢個東方威尼斯發展為旅遊勝地，點樣活化呀？唔化就真！
即係咁，由於防洪工程太慢，所以二十幾個政府部門做晒準備等住救人，因為暴雨成災九成九係會歷史重演嘅。所以話啫，今次水浸預警通報演習其實唔係咁令人感動㗎咋，反而係令人激心。
點都好啦，功夫茶呼籲大澳居民，今年特別黑仔，記住提高警覺，一見勢色唔對，速閃！順便要求陳甘美華開放香閨作為臨時難民營！