話說香港賽馬會尋日喺天水圍搞咗個招聘博覽會，提供一千五百個全職及兼職職位。雖然天水圍山長水遠，而且天公不作美，天文台上午一度發出黃色暴雨警告，但招聘會仍然人山人海，吸引咗超過一萬一千人到場應徵，幾乎逼爆會場。今時今日搵食有幾艱難，唔使講到明咯啩。
最令人估唔到嘅係，招聘會唔止吸引到天水圍居民蜂擁而至，甚至唔少住喺市區嘅居民，為咗一份工，就算山長水遠，都冒住滂沱大雨去碰吓運氣。
咁就梗係啦，比起金融海嘯風高浪急，橫風橫雨又算得係乜吖，而且馬會今次提供嘅職位，時薪最高可達四十七元，比起連鎖快餐店平均時薪二十元，簡直係超級筍工，唔爭崩頭至奇！
馬會行政總裁應家柏講咗一番話，令人好感動，佢話馬會明白依家最重要嘅係令員工有穩定收入，特別係兼職同事，因為佢哋主要依賴呢啲額外收入支持家庭開支。
聽到未吖，連馬會都知道紓解民困嘅重要性，反而口口聲聲「以市民利益為依歸」嘅財政司司長曾俊華就成個守財奴咁，麻木不仁，唔理小市民幾咁水深火熱，一味死攬住大筆財政儲備，唔知為乜！
鬍鬚曾嘅財政預算案完全冇料到，畀人插到飛起，佢死口唔認紓困不力，仲好意思自己讚自己做到瞻前顧後，反問議員錢從何來！佢話喎，要等年中睇吓情況係咪「急轉直下」，先至會毫不猶豫咁推出適當嘅加碼措施，紓緩失業同埋協助有需要嘅市民。
喂，鬍鬚曾，你係咪日日匿喺辦公室印印腳，畀冷氣吹壞咗個腦呀？你試吓冒住黃色暴雨去排隊搵工嘅滋味吖！你試吓去打一份平均時薪只有二十元嘅工吖！
家陣失業率已經升到百分之五點二，近十九萬人冇嘢做，飯碗未打爛嘅又驚住朝不保夕，如果咁都話未夠惡化，係咪要等失業率升至百分之五十二，全港得十九萬人有工開，食物銀行日日擠提，小市民集體燒炭、跳樓，咁至叫「急轉直下」吖？
話時話，搞職業博覽會都唔係馬會嘅專利，之前發展局亦隆而重之舉辦咗個博覽會，話會提供成千個主要涉及工程以及基建嘅職位，結果好多市民去到至知畀人老點，原來呢個所謂博覽會只係戙晒啲壁報板出嚟，紙上談兵，介紹啲遠水救唔到近火嘅基建項目，真係畀佢吹脹。
算罷啦，等鬍鬚曾「毫不猶豫」推出加碼措施，等得嚟都餓死啦。求政府不如求自己，唔理好天曬落雨淋，有工就見，正所謂天無絕人之路，打工仔，自求多福啦，千祈唔好旨意政府呀！