議事堂內有唔少食家，不過識食唔代表識煮，尋日扶康會第五屆烹飪大賽喺奧海城舉行，有十位議員參加，卓妮當然要去八吓新一屆議員邊個係煮得之人，原來新丁議員陳淑莊（Tanya）唔單止睇得，仲好煮得添！
Tanya話婆婆係上海人，佢自細已經跟婆婆學包雲吞，咁多年積累嘅功力唔講得笑，尋日佢煮嘅「菠菜雪耳豬肉雲吞」開正佢嗰瓣，連名廚周中都激讚啲雲吞夠正宗，試食時好快被掃光，卓妮想食都遲咗一步。Tanya男友叢鐵飛係京川菜「仙宮樓」老闆，睇怕佢等做老闆娘都得啦，點知佢話想開酒樓做老闆多啲喎！
有美女廚神自然有地獄廚神，民主黨劉慧卿憑住一味「麻蓉湯圓合桃糊」嚇倒唔少人。卿姐包湯圓時雞手鴨腳卓妮睇到眼凸，到試食時連議員都唔敢食，身為黨友嘅李永達捱義氣食咗一粒，然後就……高達話啲湯圓唔甜，皮太厚。卿姐就解窘話自己一年只係下廚一次——即係尋日，所以各議員有個共識，就係卿姐嘅廚藝改善空間好大！
除咗Tanya煮得，社福界張國柱亦唔弱，佢煮嘅「北芪黃耳紅棗炆雞」不乏捧場客，周中師傅一見到就話味餸賣相一流似模似樣，試食過之後更話味道好正。至於工聯會王國興嘅苦瓜炒蛋就削啲啦，雖然味道都唔差，但賣相差少少啦，事關因為時間關係，連伴碟嘅紅椒都無時間切絲，就咁成條椒放上去，難怪與獎項無緣啦！