立法會上周三為表決預算案開夜車，之前賣晒關子以入院治療為理由、唔肯透露係咪會現身投票嘅勞聯李鳳英，雖然喺二讀表決後先至出現，但就一直踩到落尾，凌晨時分投埋贊成票至走。兩日前我哋又喺立法會門外見到英姐，早前跌傷盆骨嘅佢篤住支拐杖行入立法會，行起路嚟冇乜問題，只係冇以前咁快。
英姐話，迄今自己只係恢復咗六成功力，醫生同佢講，今次相信要九個月先至可以復原，佢跌傷至今只係過咗兩個月，即係起碼要過多半年，佢先至有機會完全好番。英姐早幾日入院，主要學吓點樣行路，依家佢仲要日日返醫院做物理治療，不過就話自己冇戒口，亦冇飲啲咩高鈣奶。佢講笑話，好似佢咁嘅年紀，飲高鈣奶都冇用喇！
| 人人做記者 爆料方法 : | 爆料熱線： | (852) 3600 3600 | 電 郵： | news@opg.com.hk | 網上爆料 |
| 傳 真： | (852) 3600 8800 | 手機網站： | m.on.cc | ||
| SMS： | (852) 6500 6500 | MMS： | ireport@on.cc |