香港號稱美食天堂，世界各式美食應有盡有，但講到食正宗中國菜，香港可能輸蝕畀日本都未定。富士攝影器材主席孫大倫日前出席一間日本餐廳開幕，大爆尋覓多年後，終於喺日本搵到傳統風味嘅中國餐，雖然畀朋友笑佢捨近圖遠攞苦嚟辛，但原來日本食店往往世代相傳，廚藝秘方得以保存，連香港都望塵莫及喎。
卓妮最愛食日本菜，遇上孫大倫呢位食家，自然傾到雞啄唔斷。佢話因為經營日本攝影器材生意多年，已經變成半個日本通，對日本飲食文化瞭如指掌，尤其鍾意食刺身同壽司。佢話日本人唔單止拿手整日本菜，烹調法國菜同意大利菜都會加入日本元素，變成Fusion菜式，呢份精緻感喺外國都食唔到。
孫大倫又盛讚喺日本食中國菜比起香港正宗得多，最經典係佢品嘗過一道紅燒排翅，不論煮法及味道都極為特別，香港嗰啲冇得比喎。卓妮奇怪點解日本人咁有本事？孫大倫就解釋話，當年唔少移民日本嘅中國人都係靠廚藝搵飯食，為求保留傳統，會將獨門烹飪秘方傳授長子然後世代相傳，日積月累下，阿爺年代嘅料理方法都得以保存，相反中國人喜歡自己創業，子女未必願意繼承父業，就算家族擁有廚藝絕技，慢慢都會失傳。
孫大倫都深受長子繼承父業嘅日本傳統影響，佢話攝影器材生意本來係阿爸做開，但身為大仔，喺美國讀完書後就拿拿臨返香港幫老竇手，一做至今。