尋日天氣雖然唔多好，天文台仲發出黃色暴雨警告，不過無損一班拔萃男書院嘅師生同舊生嘅熱情，齊齊參加男拔萃附屬小學一年一度嘅「植樹日」，仲請嚟發展局局長娥姐林鄭月娥擔任主禮嘉賓。
娥姐兩個囝囝都係華仁舊生，不過佢大讚男拔校園環境優美，喺香港好難搵到地方咁大嘅校園。娥姐尋日做完主禮嘉賓後無急急腳走人，反而同一班師生、校友喺學校飯堂共進午膳，認真畀面！比起知名度低無可低嘅副局長，娥姐不知幾受歡迎，午膳期間不斷有學生同家長要求同娥姐合照，有唔少只係三、四年班嘅小學生添。卓妮問佢哋知唔知娥姐係邊個？啲小學生不知幾精靈，個個都知佢係林局長。
校長買滙豐退休夢碎
咁重要嘅活動，當然唔少得拔萃男書院校長張灼祥喇。早前張校長講過，佢趁滙豐一百三十五蚊時入咗幾手，諗住升到百四蚊時賺番一筆，退休歎世界。點知金融海嘯令滙豐股價低處未算低，張校長嘅退休大計無奈幻滅。卓妮尋日見到張校長，張校長笑住話之前只係講笑啫，不過佢早前趁滙豐跌到四十幾蚊時入咗貨，溝淡後依家一股約九十蚊。卓妮覺得帳面睇落雖然蝕少咗，不過依家經濟咁唔明朗，張校長又咁受學生歡迎，都係疊埋心水多做兩年校長啦。
肥仔張係田徑好手！
身為拔萃男書院校董及籌款委員會主席嘅Tommy張宇人尋日都有現身。Tommy大爆張校長讀書時係正牌乖學生，自己就係百厭星，不過因為係運動健將，好得當年校長Mr.Lowcock嘅歡心，講得上係學校嘅特權分子。Tommy見卓妮望住佢渾圓嘅肚腩，即刻話自己以前最叻係田徑，仲係首個以少於十二秒跑完一百公尺破咗學校紀錄添。Tommy仲誇口話依家跑一百公尺都唔使二十秒，卓妮又再次望住佢嘅肚腩，心諗「係真唔係啊」！
卓妮