早排有調查話，市民對一班副局長同政治助理嘅認知度，最高都只有百分之一點一，有電視台喺呢單新聞出街嗰陣，仲誤將立法會議員黃宜弘太太梁鳳儀，當成係財經事務及庫務局副局長梁鳳儀（Julia）。
Julia加入政府之前，曾經喺金管局做助理總裁，佢尋日喺立法會現身，話自己當年仲喺金管局嗰陣，經常要到內地公幹，佢曾經有過親身經歷，就係唔止一次被人誤認佢係黃宜弘嘅作家太太。Julia仲乘勢將大頂高帽笠落黃太頭上，大讚黃太喺內地係一位好有知名度嘅作家，話黃太嘅作品喺內地亦好暢銷喎。
Julia又自爆，試過有讀者拎住黃太嘅作品，去到Julia面前，希望佢喺書上簽名留念，Julia亦老實不客氣，喺本書上留低自己個大名。雖然係同名同姓，不過始終唔係本人喎？Julia就話，佢當然有向嗰位讀者解釋，其實此梁鳳儀不同彼梁鳳儀啦，即係唔會冒認囉！
至於連電視台都搞錯兩位梁鳳儀，Julia話當然知道呢件事啦，但就話無乜嘢講，只係一笑置之。咁又係，個調查話Julia嘅認知度只有百分之零點八，唔怪得連電視台都搞錯，睇嚟佢真係要加把勁啦！