執相絕技
喺日本廣島，早前出現咗一間名為「Model」嘅風俗店，專門提供出會服務，其特別之處如店名一樣，標榜所有風俗娘都擁有超高質素，甚至比模特兒更吸引！事實上，當大家Click入風俗店嘅官方網站，就會發現內裏嘅囡囡介紹，單係睇相，全部都係一啲極品級數嘅囡囡，樣貌比唔少日本名模更為省鏡，身材更Fit到漏油添！據網站嘅介紹，呢班風俗娘大部分都曾任職模特兒，因為失業，加上市道唔好難搵工，所以先會下海搵食。而網站又講明，呢班囡囡都只作短期客串，唔會長做，大家想食好嘢就要快手咁話。
無可否認，睇見呢啲索女嘅相片時，的確令人產生無窮遐想，簡直唔敢相信日本風俗業竟有如此高質嘅囡囡存在。不過，大家只要細心啲睇清楚呢啲相片，就會發現有人從中做咗手腳。事實上，利用Photoshop去修飾相片嘅情況，喺日本AV界及風俗界都相當普遍，但AV公司修圖時都會留有餘地，起碼女優會似番個人，但風俗店就唔同，直頭整到個風俗娘好似一個膠公仔咁款，擺到明呃人啦！
貴嘢冇好
據了解，喺日本確實有唔少類似「Model」呢種專搵老襯嘅風俗店，所謂模特兒級數嘅風俗娘，只係佢哋嘅宣傳伎倆，相中人同真人根本係兩回事，除咗Wet妹之外，據講仲有失婚師奶、寂寞中女等唔同類型嘅女種，唯獨是一位模特兒都冇。由於風俗店多數都係先付款後辦事，就算遇上貨不對辦嘅情況，客人都唔會獲得退款。
呢啲黑店係針對男士好奇心，利用靚相去引誘佢哋幫襯，認真離譜。至於價錢方面，一次服務收費比其他風俗店高出一倍之多，若然玩家抱着「貴嘢一定好」嘅心態去玩，中招率達百分之九十，所以大家有機會去日本嘅風俗店見識，最好事先了解當地嘅情況，無謂貼錢買難受嘛！
貨不對辦
既然啲相有造假之疑，到底仲會唔會有人幫襯？答案係會！事關呢個世界總會有人包拗頸，又或者一時間諗埋一邊，結果換來一肚氣。好似蒲友井上就有類似嘅經歷，佢話：「當初睇見呢個網站時，已經發現啲女相有問題，尤其係個樣，整到好似蠟像咁，對比其他風俗網站，真係有好大分別。不過，我覺得網站講到女仔質素咁好，更認為相片上嘅女仔應該同真人唔會有太大分別，於是膽粗粗打電話去約咗個女仔出嚟。」跟工作人員商議價錢同各項細節之後，井上就到指定時鐘酒店等候，大概二十分鐘左右，一個打扮入時嘅女仔出現眼前，當堂令佢嚇咗一跳。井上續話：「第一眼見到呢個女仔嗰陣，真係有啲嚇親，事關佢十足喺涉谷街頭見到嘅Wet妹一樣，不但濃妝艷抹，仲要着到鬼五馬六咁款，睇見都唔開胃。既然貨不對辦，梗係要換女啦！點知呢個女仔話冇得換，仲話喺網上面嗰個模特兒係佢嚟，只係轉咗個Look咁話，真係畀佢吹脹！」由於井上已經付款，加上嗰個女仔點都唔肯離開，最後惟有同佢草草了事就算。
撰文：娟娟