所以話呢，俄羅斯政府真係大驚小怪，換轉係香港醫管局，就唔會咁小題大做喇。遇到有人猝死，醫管局嘅做法係唔使隔離唔使消毒，唔理三七二十一，一於將死者器官移植畀其他病人，至於死者器官有冇病毒，關人個關咯。
話說有個女子外遊後回港，喺機上突然嘔吐大作，落機後即時送往瑪嘉烈醫院急症室，手臂、手掌有好多瘀痕，口、鼻都係血，醫生都晒頭唔知係乜病。最得人驚嘅係呢位女子入院後唔夠二十四小時已經證實死亡，醫院冇查清查楚佢嘅死因，就拿拿臨將佢嘅肝臟移植畀人。
喂，病人咁樣猝死，就算普通人都覺得唔妥啦，何況係受過專業訓練嘅醫生，點可以未查清楚就移植器官㗎！
醫管局仲死撐，話瑪嘉烈醫院完全依循既定程序指引，亦考慮到死者生前嘅病史同埋病徵，額外進行其他測試，包括登革熱病毒。
不過，傳染病專科醫生勞永樂就唔係咁睇喇，佢表示，病人外遊返嚟，病發唔夠一日就死亡，加上有出血等病徵，有機會係感染傳染病致死，隨時令到遺體器官惹埋病毒添。
聽到未呀，移植器官係為咗救人，唔係為咗害人呀！雖然話醫院係按死者遺願捐出器官，但正如香港大學感染及傳染病中心總監何栢良所講，如果移植咗受病毒感染嘅器官，會短時間內發病甚至死亡，後果可大可小㗎。
其實，連死者家屬都懷疑死者係死於急性傳染病，所以對醫院冇詳細檢驗就將肝臟移植表示擔心，因為咁樣可能令受助人無辜感染其他疾病，一個唔好彩，仲會引發大規模擴散，醫管局靠害之餘，仲要連累器官捐贈者喺九泉之下過意唔去添！
話時話，公立醫院鹵莽進行器官移植，都唔係第一次㗎啦。前年伊利沙伯醫院試過將一名患有惡性淋巴上皮瘤嘅死者誤診為良性腫瘤，再將佢嘅肝臟、腎臟分別移植畀四個病人。點知後尾對捐贈者進行解剖時至發現死者患癌，害到受助者終日擔驚受怕，要長期接受觀察，確保冇受感染，真係多得醫管局唔少。
奇就奇在公立醫院一時急驚風、一時慢郎中，應急嗰時又唔急。前排將軍澳醫院就爆咗一單醜聞，有家屬本來想捐出死者器官，諗住遺愛人間幫吓其他人啦，點知護士竟然烏龍到唔記得落簿，你話係咪混帳呀！
講到尾，公共醫療系統立立亂，完全因為有周一嶽等庸官喺度。計功夫茶話齋，唔立即將佢哋隔離，再對醫管局進行徹底消毒，小市民入醫院，隨時要作最壞打算咯！