政府施政無能導致民怨沸騰，呢排立法會門外頻頻有示威抗議，部分苦主打鑼又打鼓，更出動「大聲公」嗌到底，搞到立法會議員同職員都齊叫「頂唔順」。
立法會議員李華明話，佢辦公室就喺立法會大樓二樓，對於市民圍攻立法會示威，企過唔少街頭嗌咪嘅佢都聽到慣晒，但講到用「大聲公」抗議，肥仔明都話響聲震耳欲聾，感覺幾滋擾，試過有次頂唔順，走出門外婉轉地勸示威人士話：「你哋叫咁耐，喉都沙喇！」肥仔明苦口婆心勸市民話，心裏面有乜怨氣，用把聲齋嗌無妨，出動「大聲公」就無謂嘞。
立法會秘書長吳文華都話試過畀門外嘅「大聲公」示威聲嘈到連電話都講唔到，事關佢寫字樓喺正立法會地下，特別傳聲。吳文華拿拿臨搵咗剛啱路過嘅職工盟李卓人做「和事老」，行出門外同示威者講數，結果大家都肯收聲。
肥仔明又話，寄望新大樓建成後，示威區會離大樓較遠，加上裝埋隔音設備，示威者可以盡情大嗌之餘，議員耳仔都唔使咁受罪喎！