「條條Fing」嘅政務司司長唐英年早前多次去信立法會，對有議員喺立法會上掟蕉、掃場同大講「×街」等行為表示不滿。
尋日立法會開內委會，主席劉健儀又喺會上話，唐唐同佢講，議員喺議會粗言穢語簡直不能接受。社民連嘅議員聽完立即起身反擊，話唐唐唔知乜嘢係粗口就咪亂講喎；最奇係葉劉淑儀乘機插嘴，佢唔係同大家談論何為粗口，而係講唐唐啲英文水平低，仲隆而重之寫咗封信畀劉健儀，可算有新意啦！
葉太話自己畢業第一份工就係教英文，改人英文係佢壞習慣喎，睇到唐唐畀立法會主席嘅投訴信，發現英文水平好有問題，「有好多好基本嘅文法錯誤，咁高級嘅官員，Past tense（過去式）都唔識」，佢話覺得好羞家，總之勁踩唐唐。葉太愈踩愈㷫起，話「知道封信係夥計幫佢Draft（草擬），但咁高級官員都唔可以瞇埋眼簽㗎」，仲話「如果整慣姿勢，傳去外國，我哋點做國際大都會」！葉太踩唐唐之餘，其實都踩埋啲政務官，即係佢啲舊同事，唔知嗰啲人點睇呢？
唐唐話晒都讀過番書，但都咁唔小心，抵佢畀葉太挑骨頭。不過睇番葉太封「找錯處」信，錯處不外乎啲用錯時態、眾數寫咗單數嘅小錯誤，點知竟然要勞動葉太親身寫封信教唐唐英文，仲要特登喺內會上講添。
葉太突然出招，唔知係咪「項莊舞劍，意在沛公」呢？