商務及經濟發展局副局長蘇錦樑「Show卡片」事件餘波未了，全國人大常委范徐麗泰無辜受牽連，被人「翻舊帳」，指控佢喺○七年亂用特權，加快換領護照。范太尋日澄清，指根據可掌握資料，深信自己無濫用特權，事件發展至此，焦點又落喺入境事務處身上，要睇吓入境處處長白韞六點接波拆解。
早前消息傳出，范太○七年任立法會主席期間，都曾經獲入境處優待，以三日快證形式得到特區護照續期，早幾日范太身在廣西扶貧，身上回鄉證就有，特區護照要等返港先至查得到，於是有位畀人入。范太返港之後，全速跟進自己呢單陳年舊案。尋日佢澄清，睇番自己本特區護照，的確喺○七年二月換證，但五月先至攞住護照，去申請美國簽證，所以根本毋須要咁心急，要用特權攞快證。當然，兩年前嘅生活瑣屑事，當年申請護照前後相隔咗幾耐，佢話就真係記唔起嘞。
指未必係職員爆料
范太突然飛來橫箭，唔知邊個係狙擊手。不過，問佢點睇入境處查蘇錦樑單嘢，范太嘅答案出人意外，話未必係入境處職員爆料，可能有啲局外人知道呢件事，所以講出嚟都唔奇呢，唔知佢所指何人呢？
相信自己冇用特權
范太尋日呢番話，至少有兩點好值得細味。第一，范太話，相信自己當年無要求用特權攞快證，咁係咪意味入境處本身有一套行之已久嘅內部做法，每逢遇到行政、立法會議員申請證件，都自動波以快證形式審批？第二，如果如范太所講，「暗算」佢嘅人，同篤爆蘇錦樑嘅唔係同一個人，即係非入境處職員所為，咁又係乜嘢人做？點解遲唔遲，早唔早，指向范太嘅暗箭，喺蘇錦樑中招、港府賴咗嘢之後射出？呢啲都係疑案中嘅未解疑團。
講番入境處，面對今次內鬼連環爆料事件，都幾頭痛，要睇吓白韞六點收拾殘局。