本文重點
香港地臥虎藏龍，繼「潮州幫」、「上海幫」、「福建幫」等稱霸政商界後，「寧波幫」亦乘勢組織起來，尋晚以其士集團主席周奕卿為首嘅「世界中華寧波總商會」（世寧會）正式成立，搵嚟國民黨副主席蔣孝嚴來港亮相打響頭炮！
「世寧會」成立，三百幾名來自世界各地嘅成員及嘉賓齊集萬豪酒店撐場，身為國民黨副主席嘅蔣孝嚴尋日開完國民黨院會後，下午隨即風塵僕僕趕抵香港。佢話同寧波好有淵源，阿爺蔣介石係寧波溪口鎮人，佢身為寧波後代，梗要撐寧波幫喎，仲做埋「世寧會」嘅名譽會長。
今日飛桂林拜祭亡母
蔣孝嚴仲話，台灣都有寧波商會與同鄉會，佢會借用自己力量為海內外嘅寧波鄉親，做番啲嘢喎。蔣孝嚴今日接住飛去桂林掃墓，拜祭亡母章亞若。
除咗蔣家猛人外，原來香港亦有唔少寧波幫，尋日卓妮就喺酒會上見到呢排忙於應付爭產官司嘅已故華懋集團主席龔如心胞弟龔仁心、已故船王包玉剛千金包陪慶以及前教統局常秘羅范椒芬等。
龔仁心未返過「娘家」
龔仁心話爸爸係上海人，媽媽係寧波人，所以佢都算係半個寧波人，唔介意做埋「世寧會」會董。不過佢轉頭自揭底牌話未返過寧波，畀卓妮笑佢冇心肝，龔仁心不甘示弱話：「中國地大物博，未返過寧波好出奇咩！」
同場仲有人稱「魔童」嘅前亞視行政總裁王維基。原來佢爸爸都係寧波人，經常回鄉探親，但「魔童」就一次都未返去見過鄉里，個心好慚愧喎，希望遲啲有時間返去一轉喎。
卓妮