香港享有「美食天堂」嘅美譽，大江南北嘅佳餚都可以搵到，但中華廠商聯合會副會長施榮懷就唔係咁認同，佢話獨獨沒有佢嘅家鄉菜——福建菜。祖籍福建嘅施榮懷話，香港有唔少福建人，但真係無咩福建餐館，反而潮州菜就成行成市，幸好施榮懷家中有施媽媽呢位福建廚神，曾經有朋友食完仲讚施媽媽煮嘅福建菜全港最好味，施榮懷都為媽媽感到驕傲！
施榮懷話好多人只知道佛跳牆呢道福建名菜，其實福建菜以小食出名，台灣就保留咗唔少閩南小食。講起福建小食，施榮懷大力推薦「春餅」。春餅又名潤餅，用薄餅皮包住餡料，捲成圓筒狀攞嚟食。施榮懷話呢種小食精華在於餡料，主要係由豆乾、蘿蔔、菠菜、雞肉、糖拌炒花生等材料煮成，由於多數喺清明節先會食，所以有「春餅」之名。
唔好以為施榮懷雄赳赳一個大男人淨係識食，其實佢以前喺外國讀書時練就一身好廚藝，不過呢二十年因為有太太同傭人照顧，佢已經好耐唔入廚房喇。施榮懷最近瞓身力谷由佢擔大旗嘅香港食品嘉年華，除咗請來前高官葉澍堃等食家親自下廚外，自己都披甲上陣，炮製咗一道「福建煨雞」，市民食完都讚好，盡得媽媽真傳，一啲都唔失禮！