行政會議昨日舉行Thursday Lunch（周四午宴），煲呔曾尋日都有出席，呢個世界無Free Lunch（免費午餐），煲呔曾開餐前，都要講番篇講話當交貨。聽在場者引述，煲呔曾講講吓香港經濟衰退，突然講到復活節，話復活節有重生意思，不過復活之前，就先要經歷釘十字架喇。
尋日嘅Thursday Lunch，政界中人寥寥可數，可能大家都趁復活節長假外遊叉電，反而商界人士就唔少。煲呔曾主動發言，話唔可以食免費午餐，不過，佢嘅講話新意唔多，大意係重申金融海嘯對香港經濟嘅衝擊未見底，依家情況係二戰之後最差，政府好小心睇住形勢，預留足夠彈藥，喺有需要時就會出招咁話。
最特別嘅係，煲呔曾講到尾聲，學人玩Gag，祝大家復活節快樂！然後又話，復活節有重生意思，但係重生之前，就要經歷釘十字架嘅痛苦。到底煲呔曾呢句話係純粹臨場爆肚，定係有乜其他意思，大家不妨推敲吓。
有政界人士就講笑話，唔知煲呔曾係咪暗示，預算案唔會為咗爭取支持票而加碼派錢，寧願置先死而後生。有商界口痕友話，莫非要大家執晒笠，政府先肯出手相助？大家不妨睇吓政府嚟緊點出招！