財經事務及庫務局常任秘書長區璟智衣着一向夠潮，經常一身名牌現身各大小場合，更因為經常戴頭箍示人而畀人戲稱為「頭箍小姐」。不過區璟智揀衫嘅準則原來係要免漿燙，事關佢之前任旅遊事務專員時經常要外訪公幹，依家又成日要傍住班財金高官出席世界各地嘅經濟論壇、金融高峰會等，所以佢話衣着要得體唔失禮，最緊要係唔可以有皺褶；雖然酒店有提供洗燙服務，但區璟智都係覺得帶免漿燙嘅衫公幹最穩陣！
可能就係咁，區璟智對日本品牌三宅一生（ISSEY MIYAKE）情有獨鍾，因為三宅一生係皺褶服裝嘅始創者，佢啲衫經過高科技處理後會形成永久嘅皺褶形狀，設計標榜糅合東方嘅隨性同西方端裝嚴肅，而且三宅一生唔少晚裝都可以水洗，仲可以喺幾個鐘頭之內晾乾，所以一直被生活節奏愈嚟愈快嘅現代女性推崇。
除咗三宅一生外，區璟智仲鍾愛出名設計調皮可愛又不失女人味嘅意大利品牌MOSCHINO。不過呢兩個牌子普通一條裙閒閒哋都要幾千蚊，設計獨特嘅晚裝仲動輒上萬，難怪區璟智成日畀人叫做官場闊太！