本文重點
「怕辛苦，就唔好做廠。」工業總會立法會代表梁君彥（Andrew）上年捱義氣幫恒生銀行拍完推銷中小企銀行服務嘅廣告之後，廠佬形象深入民心。其實，Andrew點止係惠州廠佬咁簡單，佢孭住一大堆公職，搞公務肯定辛苦過搞廠，好似佢做職業訓練局主席，最近就要親自出手，搭通日本領事館條線，令旗下中華廚藝學院嘅首個日本料理培訓課程成功開檔。
一年去四五次
Andrew係家族生意新興織造廠第二代揸弗人，青年時代喺英國浸鹹水，讀針織工科同顏色化學，不過，佢同日本淵源仲深。Andrew話，三十年前已經去日本入貨，一年去成四、五次，喺羽田機場留低唔少腳毛；近年從政，家族生意有親人分擔，不過，仍然維持一年去日本旅行一、兩次嘅習慣，而且，懶得計劃行程，永遠去番嗰幾個地方。Andrew算係半個日本通，中華廚藝學院得到日本領事館首肯，合作開辦首個國際認可嘅日本料理班，相信並非偶然。
香港經濟前景未明，走在廠商最前線嘅Andrew話，唔知金融海嘯第二波幾時殺到，Andrew提醒大家，幾時都要積穀防饑。
卓妮