本文重點
教育局局長孫明揚係團體馬「良友之寶」的其中一名馬主，尋日孫太鍾小芬更首度「處女下海」入馬場為愛駒打氣，一度扯埋自己條頸巾出嚟搖旗吶喊，可惜馬仔都係跑唔出。
孫公孫太呢對馬場稀客尋日喺沙田馬場出現，原來係為團體馬「良友之寶」出賽做啦啦隊。「良友之寶」舊年咁上下時候曾經勝出頭馬，獎金撥捐汶川大地震災民，不過嗰次孫太冇入場，錯失拉頭馬機會，今次孫太入場打氣，擺明係想馬仔再做番場好戲。孫太雖然佢冇落注，但打氣時嗌到七情上面，異常投入，相反落咗注嘅孫公就滋油淡定，唔多緊張，不過馬仔似乎領略唔到主人嘅心意，最終跑輸咗。孫太笑言投注做咗善事，輸錢一樣開心。
陳祖澤唔睇好本地波
有甲組球隊傳出被內地賭波莊家利誘，因而發生「疑似」打假波事件，馬會主席陳祖澤話，馬會現時未有打算將本地甲組賽事列入馬會足球博彩內，一來政府唔會批，因為政府批准馬會經營賭波時，已考慮到本地波嘅結果太容易操控，無謂引人犯罪，二來佢覺得鍾意睇甲組嘅球迷唔算多，時機未成熟，都係唔搞好過搞。