可望於二○一一年落成嘅新立法會大樓到底擺乜藝術品好？立法會行政管理委員會打算委託專家顧問幫新大樓搜尋各類藝術展品，用家之一嘅立法會議員各有意見，立法會工程界代表何鍾泰提議擺幾個特色古董花樽點綴吓，又話喺新大樓門外豎立關公像都唔錯喎。
何議員日前中午現身香港會食飯，講起藝術擺設即時顯得眉飛色舞，原來佢鍾情收藏古董花樽，屋企已有幾件私人珍藏，但花樽係乜嘢朝代同買咗幾多錢就唔講嘞，只肯透露花樽全部有晒證書，絕對唔係假嘢，不過呢個嗜好依家已點到即止，冇再入新貨。佢話，如果新立法會大樓擺幾個古董花樽，感覺都會高雅好多，但就千祈咪嘥錢買貴嘢喎。
議員除咗討論新大樓內部擺設，都諗緊需唔需要好似舊大樓咁擺番個雕像，有人提議整番尊關公像鎮宅，何鍾泰都話可以考慮吓。立法會近年愈來愈烏煙瘴氣，又發生議員講粗口事件，關二哥話晒代表正氣，黑白兩道都畀面佢，擺番個關公像，唔睇得都嚇得喇。